VIA GALEGA – Plataforma Social en Defensa dos Dereitos Nacionais de Galiza

A campaña “Galiza nación. Un pobo con dereitos” de coloquio en Vigo con Neves Rodríguez e Henrique del Bosque

Share on facebook
Share on google
Share on twitter
Share on linkedin
Share on email
Share on telegram
Share on whatsapp

Dentro da campaña “Galiza Nación. Un pobo con dereitos”, que leva desenvolvendo Vía Galega, organízase esta palestra e coloquio en Vigo, o vindeiro 25 de marzo, ás 19,30 horas no salón de actos da CIG. Nela intervirán Henrique del Bosque e Neves Rodríguez. Debido ás medidas de prevención da covid, haberá aforo diminuído, así como a obrigatoriedade de asistir con máscara. Recoméndase solicitar acceso no correo vigo@viagalega.gal.

O obxectivo desta campaña, e, polo tanto tamén, destes actos, é desmontar a idea de que somos un pobo sen estima, sen capacidade de seu, un pobo acomplexado que precisa vivir á sombra doutros pobos, doutras culturas, para existir. Fai falla que coñezamos e dar a coñecer a nosa propia valía, as nosas capacidades, con cultura e lingua propias, que nada nos fan envexar a outras culturas ou pobos. Que a subordinación na que vivimos é unha cuestión política, unha decisión que nada ten a ver coa realidade do noso país. Somos unha nación á quen lle está negada a propia soberanía e iso lévanos a non podermos xestionar os recursos propios, que son moitos, e o beneficio destes non revirtan en nós.

É importante dar a coñecer que somos unha nación, con capacidade para existir e exercer como tal e así se recolleu no ano 1933 no IX Congreso de Nacionalidades Europeas, adscrito á Sociedade de Nacións. E isto é así porque Galiza ten unhas características individuais que lle dan este carácter: unha lingua propia, un territorio diferente, unha vida económica peculiar coa súa estrutura singular diferenzada, uns hábitos sociolóxicos que nos fan diferentes como pobo e unha cultura de seu.

Esta campaña está complementada coa axitación de rúa en forma de cartaces e vídeos de diferentes persoas do país coñecidas polo seu traballo na literatura, no audiovisual, na música, na política…e rematará cunha importante manifestación nacional o vindeiro mes de abril en Compostela.

Dentro desta campaña tamén se editaron camisolas e crachás que se poden adquirir poñéndose en contacto con Vía Galega no correo vigo@viagalega.gal.

Share on facebook
Share on google
Share on twitter
Share on linkedin
Share on email
Share on telegram
Share on whatsapp