VÍA GALEGA vén promovendo diferentes campañas e iniciativas para propagar e popularizar os nosos símbolos nacionais, nomeadamente o himno e a bandeira. Vai para tres anos que fixamos como semana de exhibición da bandeira a semana coincidente co aniversario do desenvolvemento, durante o 17 e 18 de novembro de 1918, da I Asemblea Nacionalista das Irmandades da Fala. Este ano coincidindo cos 106 anos daquela efeméride, Vía Galega continúa empeñada en revitalizar os nosos símbolos nacionais, por iso facemos un chamamento para que durante esta semana, do 17 ao 23 de novembro, se coloquen bandeiras nas nosas vivendas e, así, cubrir toda a xeografía galega de bandeiras Galegas.
Remataremos a campaña o día 23 de novembro cun acto simultáneo, ás 12 da mañá, en diferentes localidades de toda Galiza, que consistirá no izamento e colocación da bandeira galega en lugares vistosos para que perduren no tempo.
A galopante españolización e, por tanto, o ocultamente dos nosos símbolos patrios fai cada vez máis necesario impulsar campañas para divulgar o uso dos nosos símbolos, os únicos que nos representan, identifican e recoñecen como pobo e que fortalecen a nosa conciencia e cohesión nacional.
Ao día de hoxe, xa temos confirmado que numerosos concellos van colaborar na campaña, fixando e izando unha bandeira galega no su municipio. Ao mesmo tempo, vanse realizar diferentes actos, nos que está previsto, entre outras propostas, actuacións musicais, lectura do manifesto de Vía Galega e o recitado de poemas referidos a nosa bandeira de Marica Campo, Manuel María, Ramón Cabanillas, López Abente, Delgado Gurriarán e Pousa Antelo. Toda a nosa gratitude a Marica Campo pola súa xenerosidade, que compuxo un poema a bandeira galega expresamente para esta celebración.
Vía Galega proseguirá co obxectivo de que todos os concellos e vilas coloquen bandeiras galegas en lugares visíbeis e que permanezan no futuro por ser a expresión da nosa existencia como Pobo e do dereito a sermos libres.
