Vilagarcía, 7 de xullo de 2022.- A exposición “Galiza, un Pobo, unha selección” poderá visitarse do venres 8 ao 22 de xullo no Auditorio municipal de Vilagarcía de Arousa e contará cun acto de inauguración o martes 12 ás 20:00 horas, ao que asistirán deportistas de distintas disciplinas.
Esta exposición forma parte da campaña que Vía Galega está despregando por toda Galiza con diferentes accións en prol das seleccións galegas como a de promover un manifesto, unha Proposición non de Lei de Iniciativa Popular, a edición dunha revista, a publicación dun xornal, a gravación dun documental e a composición dun himno deportivo.
Consta de 20 paneis que fan un percorrido pola historia do deporte galego, cos seguintes bloques temáticos: dereito a competir; deporte base minoritario; xogos olímpicos; muller, deporte feminino e igualdade; triatlón e ironman: os homes e mulleres de ferro; a auga, fogar do deporte galego; fútbol: Galiza, potencia ; equipos de primeiro nivel en todas as disciplinas e deportes tradicionais.
Vía Galega, con esta exposición e as outras propostas, pretende levantar un movemento o máis amplo posíbel para reclamar o dereito de Galiza a estar representada, como tal, en todas as disciplinas deportivas, podermos conformar seleccións galegas en todos os deportes e termos o dereito a participar a nivel oficial e internacional. Mais, tamén, que os e as nosas deportistas poidan competir baixo a bandeira galega e exhibila cando soben ao podio. Sen esquecérmonos da necesidade de galeguizar o deporte e impulsar a igualdade de xénero.
