VIA GALEGA – Plataforma Social en Defensa dos Dereitos Nacionais de Galiza

O Museo do Pobo Galego acolle a exposición “Galiza: un pobo, unha selección”

Share on facebook
Share on google
Share on twitter
Share on linkedin
Share on email
Share on telegram
Share on whatsapp
Presentación no Museo do Pobo Galego

A mostra está promovida pola Plataforma Vía Galega, que integra máis de 60 colectivos sociais, culturais e deportivos

Santiago de Compostela, 1 de decembro de 2021.- A Plataforma Vía Galega trae a Compostela a exposición “Galiza: un pobo, unha selección” que se poderá visitar até o 9 de xaneiro, de martes a domingo, en horario de 11:00 a 14:00 e de 16:00 a 18:00 na ala sur do Museo do Pobo Galego.

No acto de inauguración, celebrado esta tarde, participaron Anxo Louzao, portavoz da Plataforma Vía Galega; Xurxo Couto, responsábel de Cultura da Deputación da Coruña; Manuel Vilar; director do Museo do Pobo Galego; o xornalista Héctor Pena, que realizou a coordinación dos textos da exposición; e Iria Méndez, da Coordinadora de Vía Galega.

O portavoz de Vía Galega, Anxo Louzao, destacou na súa intervención que con esta campaña a favor das seleccións deportivas galegas “preténdese reclamar que Galiza como pobo teña o dereito a ter seleccións propias para competir profesionalmente e a nivel oficial en todos os deportes, tanto nas seleccións femininas como masculinas, e que os/as deportistas teñan garantido ese dereito”. Ademais, quere fortalecer a conciencia nacional mediante o deporte, potenciar os deportes populares, incidir na galeguización do deporte e impulsar a igualdade de xénero.

Ademais desta exposición que se exhibirá en 35 cidades e vilas galegas, “a campaña complétase coa publicación dunha revista e dun xornal, cunha canción que sairá nos próximos días e cun vídeo que conta coa participación de diversos deportistas galegos de recoñecemento internacional”.

“Galiza é unha potencia tamén na esfera deportiva, mais está invisibilizada ao non facultar o Goberno da Xunta a posibilidade de dispor de seleccións nacionais galegas, e para facelo realidade é necesario ter o dereito a exercer todas as competencias, con soberanía e con capacidade de decidir tamén no ámbito deportivo”, concluíu Anxo Louzao na presentación.

Share on facebook
Share on google
Share on twitter
Share on linkedin
Share on email
Share on telegram
Share on whatsapp