Vía Galega presenta un documental dentro da campaña “Galiza, un Pobo, unha selección”
Pódese ver nesta ligazón https://www.youtube.com/watch?v=z3O4hGe9XgA
Santiago de Compostela, 28 de decembro de 2021.- Vía Galega, dentro da campaña “Galiza, un Pobo, unha selección”, vén de realizar un documental coa participación de 13 persoas relevantes e representativas do deporte galego. Nese vídeo verten a súa opinión sobre o dereito, o interese e a necesidade de poder competir representando a Galiza oficialmente e internacionalmente en todas as disciplinas deportivas.
Declaran que sería a unha oportunidade moito maior para as nosas e os nosos deportistas poderen participar en competicións internacionais, xunto con manifestar o dereito a poder escoitar o himno galego no podio, amais de ser emotivo e emocionante. Sinalan como Galiza no deporte é unha verdadeira potencia e referente en distintos deportes a nivel mundial e subliñan a importancia que ten o deporte na loita pola igualdade de xénero.
Participaron neste documental:
Fernando Vázquez. Adestrador da selección galega de fútbol
Caetano Horta. Diploma olímpico en remo nos Xogos Olímpicos de Tokio
Xulia Vaquero. Plusmarquista dos 5000 mts. Subcampioa europea de cros.
Gustavo César Veloso. Ciclista. Gañador da Volta Portugal
Eva Castro. Podio europeo e campioa estatal de ciclismo de montaña.
Luís Penín. Alpinista. Premio estatal de escalada en xeoque coronou cimas por todo o mundo)
Alba Cuba. Subcampioa Estatal de triatlon
Alexandre ‘Jano’ Sanmartín. Seleccionador nacional de fútbol gaélico
Mercé Barrientos. Taekwondo: Expresidenta da Federación Galega
Xan Rodiño. Presidente da A.C.D de Billarda das Rías Baixas
Xurxo Souto. Impulsor das seleccións e de Sareirxs Galegxs
Manuel Polo. Adestrador de atletismo
Cristina López Villar. Profesora da facultade de Ciencias do Deporte da UDC.
O documental, de 11’ 31’’ de duración, pódese visualizar nesta ligazón.
Vía Galega quere agradecer publicamente a disposición e participación desinteresada de todos e todas elas. Agora, correspóndelle á Xunta tomar en consideración a opinión destes referentes do ámbito deportivo que xunto cos milleiros de cidadáns e cidadás están a reclamar seleccións galegas en todos os deportes. O Goberno galego non pode continuar de costas a esta reivindicación e ten que reclamar as competencias plenas para poder competir oficialmente coas nosas seleccións. O seu desleixo e desprezo aos nosos símbolos e a todo o que nos conforma como nación é tan extremo que até evita os encontros amigábeis, co obxecto de invisibilizarnos como galegas e galegos e afondar máis na nosa irrelevancia como País.
Vía Galega continuará coa campaña para ir sumando máis voces e levantar una amplo movemento social que sexa capaz de provocar un cambio de rumbo da Xunta para que atenda e entenda que aos galegos e ás galegas só os representan as seleccións galegas e as súas e os seus deportistas.
