Vía Galega foi coñecedora no día de onte dun vídeo publicado por un militante da formación de ultradereita Vox, no que fachendeaba de que a bandeira galega do mastro da praza Valentín García Escudero, instalada o pasado mes de novembro nun acto promovido pola nosa entidade, “desaparecera”.
O sucedido en Pontevedra non fai máis que reafirmarnos no que en numerosas ocasións temos exixido en Vía Galega: a urxencia da necesidade de defender os nosos símbolos nacionais, fronte á escalada de españolización e ocultación dos mesmos. Só desde o odio a Galiza e a súa cultura e, por tanto, ao pobo galego, se explica unha actuación deste tipo. Non hai absolutamente nada, agás un supremacismo españolista que non ten encaixe neste País, que xustifique o roubo dunha bandeira galega. Aproveitamos para lembrar, por se existise algunha dúbida, que a bandeira que alí estaba instalada, está ampara pola Lei de Símbolos de Galiza desde 1984.
Vía Galega vén promovendo diferentes campañas e iniciativas para popularizar os nosos símbolos nacionais, nomeadamente o himno e a bandeira. Hai tres anos, coincidindo coa I Asemblea Nacionalista das Irmandades da Fala, iniciamos un traballo de difusión masiva da nosa bandeira. O pasado mes de novembro, cando se cumpriron 107 anos da efeméride, retomamos a campaña dándolle continuidade ao traballo iniciado nos últimos anos e, así, o 15 de novembro instaláronse numerosas bandeiras por toda a xeografía galega. Un acto cívico, co único obxectivo de mostrar o noso orgullo de pertenza a un pobo, o galego.
Sabemos das preferencias de Vox por outro tipo de bandeiras de corte fascista, mais que non teñen lugar aquí, e así quedou demostrado en numerosas ocasións. Galiza é unha nación demócrata e orgullosa de si mesma, no que rexeitamos o seu discurso de odio e a súa proposta de asimilación lingüística e cultural, porque queremos manter a nosa identidade como pobo diferenciado, cos nosos símbolos, e por suposto coa nosa bandeira. É precisamente isto o que non tolera o españolismo, que exista un pobo que a pesar de séculos de asimilación, continúa a resistir.
Como galegas e galegos, defendemos un mundo mellor, máis xusto e en liberdade, construído por todas e todos, desde aquí. Por iso, non imos permitir que os mesmos que intentaron eliminarnos no pasado, volvan intentalo. Así mesmo, reclamaremos que a bandeira sexa reposta o máis axiña posíbel, para demostrarlles que non nos van amedrentar nen frear, porque son uns imperialistas fracasados.
Fascismo Nunca Máis!
