VIA GALEGA – Plataforma Social en Defensa dos Dereitos Nacionais de Galiza

Search
Close this search box.

Vía Galega participa na Feira do Libro de Frankfurt

Mesa redonda

Intervén na mesa redonda “O dereito de autodeterminación, referendo e democracia desde abaixo”

Frankfurt, 22 de outubro de 2022.- Co gallo da Feira do Libro de Frankfurt, que este ano ten como convidado de honra o Estado español, xorde BeyondSpain, unha iniciativa alternativa que ofrece un espazo para a creación cultural e literaria, para as linguas e os dereitos lingüísticos, para as ideas democráticas, antifascistas e anticoloniais. Un espazo para os colectivos que queren mostrar a outra realidade sobre as linguas, culturas, literaturas e o activismo político.

Dentro do programa do 22 de outubro organizouse unha mesa redonda co título: “O dereito de autodeterminación, referendo e democracia desde abaixo”. Nela participaron a Assemblea Nacional Catalana por Catalunya, Gure Esku por Euskal Herria e Vía Galega por Galiza.

Desde a ANC subliñaron que as violacións sistemáticas dos dereitos humanos e políticos aplicadas até o de agora no caso catalán afectarán ás futuras normas democráticas da UE e sentarán un perigoso precedente para a cidadanía da UE. Así mesmo denunciaron que o “Catalán Gate” é o maior caso de espionaxe político do mundo e que as autoridades abusaron dos dereitos humanos de 65 políticos e activistas independentistas cataláns polas súas ideas.

Adrián Bravo, de Vía Galega, incidiu en que “a negación dos dereitos colectivos dos pobos leva implícita a limitación dos dereitos individuais das súas persoas. “O exercermos a plena soberanía, o termos a plena capacidade política, non só é un dereito inalienábel, como nación que somos, senón que se torna imprescindíbel para paralizar o espolio e dispoñer dos nosos recursos naturais e produtivos, para termos un sector financeiro público e propio, para desenvolver a nosa base produtiva e os sectores estratéxicos da nosa economía”, explicou.

Así, Adrián Bravo avogou por “reivindicar e loitar por un proceso de industrialización do noso país, rachando co modelo actual de industrias de enclave, apostando polo noso rural como unha potencia alimentar, defendendo a nosa soberanía enerxética cunha tarifa eléctrica galega onde as galegas e galegos sexamos beneficiarios directos da produción que se realiza no noso pais.”

Desde Gure Esku, pola súa parte, enfatizaron que dada a situación que se vive en Europa, é imprescindíbel romper a situación lóxica da real politik que conduce a guerra. Na actualidade non cabe falar de conflictos internos; como está sendo evidente na guerra da Ucraína, cuxas consecuencias cruzaron rapidamente as fronteiras dos estados, dado que pola súa banda están convencidos de que debe intervir e debe facilitar unha resolución democrática dos conflitos territoriais de soberanía, no só por unha cuestión de democracia e liberdade, senón tamén para previr conflitos máis graves que poidan afectar a toda a Unión e para reforzar o proxecto europeo.